ÇilənAy Nur Faiqdən şeirlər

Ata

Ata övladını gözüyaşlı qoymaz.
Sən mənim gözümdə yaş oldun, ata!
Səninlə sevindim, səninlə güldüm,
Sən getdin yerini boş qoydun, ata!

Qəlbimdə sağalmaz bir yara açdın.
Dünyadan tez doyub cənnətə qaçdın.
Ömrünün yetdiyi hər an, hər dəqiqə,
Qaranlıq dünyama sən işıq saçdın.

Çiynimə dağ boyda dərdi qoymusan.
Güllər açan yerdə sənsə solmusan.
Bir kərə səsimə səs ver ki, görüm,
Niyə bu dünyadan sən tez doymusan?

Sızlayan ürəkdir, ağlayan gözüm.
Dərdimi deməyə yoxdur bir sözüm.
Sən gedən o yerə gedərdim özüm.
Sən niyə vəfasız çıxdın, ay ata!

Baxıb gözlərimə imdad diləyib.
Bir kəlmə sözünü deyə bilmədin!
Əzabla yaşayıb, əzabla öldün,
Dünyada gün üzü görə bilmədin!

Cismin o dünyada, ruhun mənlədi.
Sənsiz olan dünyada donub qəmlədi.
Bir zaman səninlə gülən gözlərim,
Sən gedən o gündən yaşla, nəmlədi.

Ətrafım insanla dolu olsada,
Gözlərim hər yerdə səni axtarır.
Sənin bu dünyadan vaxtsız gedişin,
Bilirsən nə qədər ürək dağlayır?

Yenə də gözlərim yolarda qalıb.
Elə bil nə vaxtsa evə gələssən.
Oturub səninçün ağlayanda mən,
Burdayam göz yaşın tökmə deyəssən.

Məzara qoydular dura bilmədin.
Bilirəm dünyadan doya bilmədin!
Sənə rəhmət verən o insanların,
Durub ağızların yuma bilmədin.

Qaytarmır aldığın torpaq heç zaman!
Qəlbimdə qalassan bil ki, hər zaman!
Unutma heç zaman tək deyilsən sən!
Gözlə  gələcəyəm mən də bir zaman!

Sonda bircə kəlmə qalıb bizlərə.
Məzarın hər zaman nurlarla dolsun!
Dünyaya sığmayan o ömrün sənin,
Getdiyin dünyada cənnətlik olsun!

Atasız dünya

Ömrün günün bezar oldu!
Dərdin sənə azar oldu!
Torpaq deyil, ay ata.
Dünya sənə məzar oldu!

Bilirəm getmisən gələ bilmərsən!
Dərdimi mənimlə bölə bilmərsən!
Deyirlər dünyanın qanunudur bu.
Ölənlə bir yerdə ölə bilmərsən!

Gələcək günlərin nə mənası var?
İçimdən keçmişə qayıtmaq gəlir!
Sənsiz bu günlərdə yanan ürəkdən,
Səni o məzardan ayıltmaq gəlir!

Bir zaman getdiyin o yollar səni,
Qoynunda ömürlük məhbus saxlayır!
Bu gediş o qədər ağır oldu ki,
Gözlərim durmadan dərdə ağlayr!

Darıxıb qəlbini sıxma, ay atam!
Mən sənin bircə qat yuxarındayam!
Qovuşmaq yaxındır səbr elə bir az!
Bir də görəssən ki, qucağındayam!

Qapqara dünyanın bu ağ qızının ,
Taleyi bir azca ağ olaydı kaş!
Mənə qazılardı o soyuq məzar,
Atam bu dünyada sağ olaydı kaş!

Keçmişdə çoxları deyirdi mənə.
Yazma qəm-kədərdən bəsdi bu qədər!
Atasız dünyanı dərdi yamandı.
Qayıt gəl sənsizlik bəsdi bu qədər!

Cənnətdəki yaş günün.

Həyatda yoxdur səsin.
Gəlmir artıq nəfəsin.
Cənnətə çox tez uçdun,
Dünya oldu qəfəsin!

Əlli beş illik ömrü ,
Qoyub hara getmisən?
Söylə torpaq altında ,
Vüsalamı yetmisən?

Cənnətdəki ilk yaşın,
Mübarəkdir, mübarək!
Sənsiz qalan bu dünya,
Qiyamətdir, qiyamət!

Bir gün gələcək bu gün,
Sənlə birgə olacam.
O gün gələnə qədər,
Mən səni tək qoyacam.