Ələsgər Əhməd - Yeni şeirlər

Xəyali görüntülər "3D"

Arabir, 
eynəkdən xeyir görməyən gözlərim, 
Bizi bir masada göz - gözə gətirir 
Maşınların arxasından, 
burnumuzun ucunda reklam olunur 
Xəstəxana sıxlığından öncəki 
"qəza ətiri"
Belə alınmasını istəməsəm də
həmişə belə alınır 
-Burda sualları mən verirəm!- 

.......

Ucuz toylara bahalı siqaretlə getməyim, 
məni nə qədər varlı göstərir? 
Bu adam, gözündə,
nə qədər "özündən razı" olur? 
İstənilən toyun gecəsi, 
rahatlığımın bakirəliyi pozulur 
50 manata alınan rahatlığımın 
Nə bakirəliyindən maraqlı tərəfi var, 
nə də hissləri.
Burnumdan yediklərim, 
gözümdən spirtli su axır 
Səhər parkda, 
sevgilinin qucağında dünyəvi məsələləri həll edirsən 
damağımdakı ucuz siqaret, 
yağış yağdırmaq üçün, 
ard-arda tüstü buraxır 

Axı sən, 
məni heç vaxt başa düşməmisən 
Bəlkə bir fincan çay, 
bəlkə kokteyl? 
Hər nəysə.
Elə o gündən, 
həm səndən olmuşam, 
həm də arxayın 
Qışqırıb, demək istəmişəm:
Hər dəfə qışqırmağınız, 
həqiqəti deməyiniz deyil 
Bir dəfə də, 
mənim ayaqqabılarımla futbol oynayın. 

Görəsən İsanın atası olsaydı, 
mənim kimi bezərdimi? 
"Aramsız zənglərdən"
Sənə görə pulqabısını boş saxlayan, 
atasından küsərdimi 
üzü ağ çıxardımı, qara rənglərdən? 
Deyəsən bir az qorxursan, 
cavidin iblisindən- tanrının şeytanından 
İsa burda doğulsaydı, 
özünü asardımı, bayraq meydanından? 

Ya da, bunu soruşum;
Şairlər haqqında nə düşünürsən? 
Sevgidən danışarkən, 
xəyanət edən Nazım Hikmət haqqlıdı? 
Yoxsa
öz uşaqlarından başqa, 
bütün uşaqları sevən, Aziz Nesin? 
Bircə bunu pıçıldadın

-Şeirdə elə ağlamalısan ki, göz yaşı bilinməsin.-


Texniki qüsurlar 


Sənə, 
ürəyin boyda təşəkkür edirəm 
Dostlarımı mənimlə tanış etdiyin üçün 
Ən azından üçünün, 
ağlından səni sevmək keçirdi 
Dostlarımı səhv seçməkdən başladı 
Ucuz kafelərdəki 
-bahalı borclarım-
- divardakı yazıları təmizləməyim-
-cizgi filmləri izləməyim-
Anamın qarğışı, 
atamın nifrəti 
Bütün müvəffəqiyyətləri yaşadım, 
müvəqqəti. 
Körpülər qorxudan yıxılırdı 
Ordan ayaqsızlar demək, keçirdi.
Sənə də yazığım gəlir, 
ayaqlarını burda qoyub, getdiyin üçün 

Bu gün də, 
romantikadan başqa hər şey bacarıram 
Hamıdan fərqli "unutmuram"
Görüşlərdə təkcə, 
gözümün içinə baxmağın yox, 
Büstlərin göyərçinlərə daş atmağı da, 
2 addım o tərəfdə, 
kostyumlu kişinin, 
manatını dilənçiyə xırdalatmağı da, 
gözümü döyəcləyir
Səmimi müzakirələrdən çəkilirəm, 
ad günü şəkilləri kimi 
Hislərim bir aydan bir gicləyir
Diktaturanın hökm sürdüyü ölkələrin, 
piyada millət vəkilləri kimi 

Çox yaxşı bilirsən ki, 
adıma görə, siqnal səsindən zəhləm gedir 
Tərslikdən də, 
hər günümüz tıxacdı 
Məni həzm edə bilməyənlər, 
səni dada bilməyənlər acdı 
Bizi bir süfrədə görənlər, 
iftar açmasalar da toxdu 
Dekart deyir, 
" düşünürəmsə, deməli varam"
Mənsə belə düşünürəm, 
" məni düşünməyənlər, yoxdu"

Məni düşündüyün üçün, minnətdaram! 

Və bunu da bilirsən 
İzlədiyimiz sevgi filmlərinin, 
ayrılıq hissələri:
Qısqanc sponsor reklamlarıdı 
Gözümün işığı da, sönür axırda 
Hal-hazırda, 
bundan duyğusal nəsə tapa bilmirəm 

"
Rast ki, 
xərçəng xəstələri həyatın, 
ən unutqan sağlamlarıdı,
xəstələnməyə başlayım 
Həkim ol-
adın da, Pol Raski "

Bir də ki, 
" kukla kimi qızdır" dediklərimiz 
böyüyüb, qadın kimi- kukla oldular 
Adım kimi əminəm. 
Başqa gecələrdə unuduldular 
Bir gecəlik, 
geyindikləri gecəliyin sayəsində sevildikcə 

Ağ rəngli parçalar 
qırmızı rənglə şərəfə, 
Qollarının biri bir tərəfdən, 
ayaqlarının biri o biri tərəfə çevrildikcə 
yoruldular, Lia 

Bugündən etibarən, 
şəkillərimizi çəkən, 
bütün fotoqrafların sənəti:
foto-xoreoqrafiya.



İnqilabçı jurnalist 

İrqçi qara maska taxıb, 
güllələdi afrikalı şairi 
Göyərçinlər Ağ evin dövrəsində, 
oxudular şeiri. 

Gözlərimə qan yığıldı 
Bağırdıqca, azaltdılar səsimi 
Gördüm çarmıx qardaşıdır 
İsa ilə Nəsimi 

İndi şahlar taxtından yox, 
Öyrəşiblər təyyarədən enməyə 
Qəddarlığı görüb, susma 
Çək qırmızı xalçaları altlarından 
Qaç, 
karusel tap, dönməyən. 

Dünya xəritəsini cırıb, yandır 
Heç kim səni bölməsin 
İsanı da geri qaytar, 
göyərçinlər şeirləri bitirəndə 
Başqa şair ölməsin. 

Get, şahların şahını da gətir, gəl 
Susub, üstünə qışqır 
Kürsüsünə taxtını qoy, 
danışdır. 
Vəzirlərə tapşırsın ki, 
hər cəllada 
Gül buketi almalıdır deyilsin 
Gördün əgər alınmır, 
tulla ayaqqabını 
İçindən sülh iyi gəlsin. 

Mən ki, sənə inanıram 
Hamı sənə inanmır. 



Sonuncu qərar

Kamyunun yadından çıxan Merso 
Niyə görə ağlamadı? bilsən, 
unutmazsan. 
Mən bilirəm, ağlamıram 
Dama- dama dəniz olsa, nə xeyri? 
Sən ki, Musa deyilsən. 

Evin divarlarından, 
gözün üzərimdədi
Görürəm, 
qucaqlamaq istəyirsən 
Əllərinlə saçımı sıxıb, ağlamaq istəyirsən 
Eh, yaman çərçivələşmisən 
Artıq başqa mətbəxdə 
bişir qadınlığın da 
Qapıyla, pəncərənin bir addımlığında,
Unutmusan, eşqin arxa fonunu 
Deyəsən, evləşmisən

Bir gün ayaqyalın gəl, 
Gör, nə qədər soyuqqanlıq
görübdür, bu döşəmə 
Qollarını açıq saxla 
qucaqlayım, üşümə. 

Ya da bilirsən nədi? 
Yoldaşını, körpəni də mənimsə, 
mənim - sənin olmasın 
Başqasının arvadını, 
qucağında körpə olan qadını qucaqlaya bilmərəm
Gələn günün olmasın.